Entrepreneurship kachihi iwuivanga ithumwuili khalei awor, lansin kala sakashap chili makanvalaga masapai maraomana kachichi ngakheikhang eina sashoklaga mikateibingwuivangla kankhana samphang khangasak chili kahangna.

​

Entrepreneur akhasada yarui na ngasheida khalei, kala chotlak eina phungchingda khalei marambingchi kazemkhuilaga chili khangasunna apong phaningshoklaga yaruili kachotchi eina sontakhami, kala chieina ngasoda tongkapai leihsak semkaka hina.

​

Entrepreneurshipwui shongza khangakhui hili tarkar salak kahai asak-avatbing chiya:

​

• Kakhalat leilak eina maram phakhuida khalatda kasatkakhui kala kathong kakhui

• Ngarakzak kahai tuilep khuitheilak eina kakhui

• Mangashong khirashokra kachi  matheilala ngasungaireoreo muiva kashap

• Mibingli ngashik katheimang maningla, machanlak kahai otsak kala tuihan-chanhan kathei

​

Atungli hangkahai asak-avak binghi ngarungkhung eina kashur chitharan shongponghi mashamei kala heiunla mathamei papamma. Kha ithumna thukmeida yangkazang chitharan asak-avakhi chekchinlak eina mayon salala ithumwui ningchuk kala ningphanin hi mathada masing kakhui tharan ithum vachotshon haowa.

​

NINGWUI RAI

​

Nawuili idea mathalak kahai leisalapai. Nawuili haophok khavai lan kala misaka kachi mila leisalapai. Kala nawuili leihsak sapailak kahai asak-avakla leisalapai. Kha entrepreneurshipwui shongza ngakhuikida khalei hili nawui ningphanin kala ning-uklungwui rai ngararkashapwui khangaran mathada masakha, konglui khavaiwui khalenva leisashonra.

​

Entrepreneur akhasada, nawuili leikhangayi katonga leisalala, azingli mikahai ning/kuingatok wui rai kala pakhangapa hiva ngasung khavai ngaranpinglu:

​

• Khi rashokni khalada matheimada chiwui kuikasawui kachot

• Khisalakda khalei kala khiwuivang haophoksa khalada hukkachihak

• Khalatda mashitsang kharar atam

• Mashana sangailala masakharar atam

• ​

Entrepreneur akhawui ot ungshung ngasaksa chiakha akhalatda kakasat kala kathong kakhuili kachungkha leiya. Kala katung-kaka lila ningmakatat lakla nganingshap khavai kasahina sakmeikap kachi shongza akhana. Kala hiwui khangasung hili mibingli ayat tada mangahan kathei kala leihsakrin vatkahai tharan chotmeikhar thuihaowa. Kha Entrepreneur akhana hangkahai hibinghi ngarakzat eina ngaphangkhuishap kahai tharan ngaironda awui kharin kala ngashankhavabingchi ana sakhangai leih chili semkapaiphok haowa.